Ökuréttindi

Sektir og refsipunktar

Skrá um vægi brota í punktakerfi og önnur viðurlög sem fylgja þeim brotum svo sem sektir og sviptingar. Yfirlitið er úr reglugerð um ökuferilsskrá og punktakerfi, nr. 929/2006 og reglugerð um sektir og önnur viðurlög vegna brota á umferðarlögum og reglum settum samkvæmt þeim nr. 930/2006. Viðurlög við umferðarlagabrotum og brotum á reglugerðum sem tengjast þeim eru aðallega sektir. Við alvarlegustu brotunum s.s. ölvunarakstri og grófum hraðabrotum er auk sekta beitt sviptingu ökuskírteinis í skemmri eða lengri tíma. Við ítrekuðum ölvunarakstri og mjög grófum brotum er auk þess heimilt að gera ökutækið upptækt.

Árið 1997 var tekið upp refsipunktakerfi á Íslandi en slíkt kerfi hafði reynst mjög vel meðal annarra þjóða. Kerfið gerir ráð fyrir að þeir brotlegu í umferðinni safni refsipunktum. Þegar punktar verða 12 á þriggja ára tímabili missir ökumaðurinn ökuréttindin í 3 mánuði. Refsipunktar fyrir brot fyrnast á þremur árum þ.e. punktar fyrir ákveðið brot falla niður af ökuferli ökumannsins þegar þrjú ár eru liðin frá broti. Við útsendingu sektartilkynningar er tekið fram hvort brotið leiði til refsipunkta og þá hversu margra. Einnig er tilgreint hversu marga punkta í heild ökumaðurinn hefur fengið. Refsipunktakvótinn er aðeins minni fyrir þá sem eru með bráðabirgðaskírteini sem er til þriggja ára. Þar er kvótinn 7 refsipunktar á þriggja ára tímabili.
Handhafi bráðabirgðaskírteinis, sem fær 4 refsipunkta í ökuferilsskrá, er settur í ótimabundið akstursbann. Ökuskírteinið fær hann ekki aftur fyrr en hann hefur sótt sérstakt námskeið og tekið ökupróf að nýju. Sama á við ef handhafi bráðabirgðaskírteinis fær sviptingu vegna ölvunaraksturs eða hraðabrots. Akstursbanni er aðeins beitt einu sinni.
Refsipunktum er beitt vegna alvarlegustu brotanna, þó ekki við ölvunarakstri því þar gilda sérstakar sviptinga- og sektarreglur.

Hér að neðan er tafla um þau umferðarlagabrot sem refsipunktakerfið tekur til og þær sektir sem þeim fylgir.

Í þeim tilvikum þegar hópbifreið, önnur bifreið sem er meiri en 3.500 kg að leyfðri heildarþyngd eða bifreið með með eftirvagn eða skráð tengitæki er ekið yfir lögleyfðum ökuhraða skal beita sektarfjárhæðum í eftirfarandi töflum að viðbættu 20% álagi á sektarfjárhæð.