Umferðaröryggi

Umferðaröryggisáætlun

Framkvæmd umferðaröryggismála fluttist frá dómsmálaráðuneyti til samgönguráðuneytis 1. janúar 2004. Frá þeim tíma hefur verið starfandi sérstakur stýrihópur sem m.a. var falið að móta heildarstefnu í umferðaröryggismálum. Í stýrihópnum eru fulltrúar samgönguráðuneytisins, Umferðarstofu, Vegagerðarinnar og embætti ríkislögreglustjóra.

Með þingsályktun um fjögurra ára samgönguáætlun fyrir árin 2005-2008 sem lögð var fram af samgönguráðherra á Alþingi og samþykkt þann 30. maí 2005 var umferðaröryggisáætlun í fyrsta sinn felld inn í samgönguáætlun. Áætlunin er lögð fram á grundvelli laga um samgönguáætlun nr. 71/2002, en markmið stjórnvalda um aukið umferðaröryggi til ársins 2016 eru:

• Fjöldi látinna í umferð á hverja 100.000 íbúa verði ekki meiri en það sem lægst gerist hjá öðrum þjóðum árið 2016.
• Fjöldi látinna og alvarlegra slasaðra í umferð lækki að jafnaði um 5% á ári til ársins 2016.

Í umferðaröryggisáætlun samgönguáætlunar var jafnframt sett fram sérstök framkvæmdaáætlun um sérstakar aðgerðir sem eiga að leiða til fækkunar slysa og lækkunar kostnaðar samfélagsins af umferðarslysum. Til grundvallar á vali aðgerða var stuðst við tillögur starfshóps um umferðaröryggisáætlun til ársins 2012 - markmið og aðgerðir. Við mat á forsendum um virkni aðgerða var í flestum tilfellum stuðst við erlendar rannsóknir.
Aðgerðir sem teknar voru til sérstakrar skoðunar skiptast í eftirtalda flokka:

• Lægri ökuhraði
• Öruggari vegir
• Betri ökumenn
• Öryggisbúnaður farartækja
• Löggæsla/forvarnir
• Samstarf og þróun

Umferðaröryggisáætlun er endurskoðuð á 2ja ára fresti. Umferðaröryggisáætlun fyrir tímabilið 2007-2010 er að finna í tillögu til þingsályktunar um samgönguáætlun á grundvelli laga nr. 33/2008.