Umferðaröryggi

Samkvæmt upplýsingum frá lögreglu höfuðborgarsvæðisins voru tæplega 70 ökumenn stöðvaðir í miðborginni á fimmtudagskvöldinu og um nóttina í umferðareftirliti lögreglunnar. Einn þeirra, karl á fimmtugsaldri, reyndist ölvaður við stýrið. Á sama tímabili voru tveir aðrir karlar, annar á þrítugsaldri en hinn á fertugsaldri, teknir við akstur annars staðar í borginni en þeir voru báðir undir áhrifum fíkniefna. Þá var 18 ára pilti gert að hætta akstri í Árbæ síðdegis í gær en sá hafði þegar verið sviptur ökuleyfi.

Það er spáð versnandi veðri á fjallvegum um vestan- og norðvestanvert landið seint í kvöld, hríðarveður og slæmt skyggni verður fram á nóttina. Búast má við hviðum allt að 30 ¿ 40 m/s á Kjalarnesi og undir Hafnarfjalli frá því kl. 21 til 22 í kvöld og fram á nótt. Eins um svipað leyti undir Eyjafjöllum og litlu síðar í Öræfasveit.

Vegna hættu á slitlagsskemmdum hafa verið settar 10 tonna þungatakmarkanir á nokkra vegi á Austurlandi og eins á Suðausturlandi alveg vestur að Hvolsvelli.

Umferðarstofu hafa borist ábendingar frá gangandi vegfarendum um að einstaka ökumenn virði ekki þann rétt sem gangandi hafa þegar gengið er á gulu blikkandi ljósi yfir ljósastýrða gangbraut. Þegar rautt ljós sem skín á bílaumferð breytist í gult má ekki aka af stað fyrr en tryggt er að gangandi séu komnir yfir akbrautina. Svo virðist sem ökumenn virði þetta ekki sem skyldi.

Þegar bíll bilar í umferðinni þarf í öllum tilfellum að gera ráðstafanir til að aðrir bílstjórar sjái bílinn. Nauðsynlegt er að settur sé upp viðvörunarþríhyrning aftan við bílinn í það mikilli fjarlægð að aðrir ökumenn sjái tímalega að hætta sé framundan. Það má hafa það sem viðmið að þar sem hámarkshraði er 60 skal setja þríhyrninginn í 60 metra fjarlægð. Einnig skal kveikt á viðvörunarljósum eða svonefndum hazardljósum.

Eftir asahláku síðustu daga sér nú niður á malbik á flestum götum höfuðborgarsvæðisins. Umferðarstofa minnir ökumenn á að þó svo að færðin sé mun betri núna en undanfarnar vikur eru enn í gildi reglur um hámarkshraða. Sérstaklega skal minnt á að halda hraðanum í hófi í íbúðarhverfum þar sem 30km hámarkshraði er í gildi.

Lögreglan á höfuðborgarsvæðinu hefur komið að þremur umferðarslysum undanfarna daga þar sem slys urðu á fólki. Eitt slysið er rakið til þess að biðskylda var ekki virt og ökuhraði ekki í samræmi við aðstæður. Í öðru slysi beinist rannsókn lögreglu bæði að of hröðum akstri og akstri gegn rauðu ljósi. Í því þriðja var ekið á gangandi vegfaranda. Á þeim stað eru ekki umferðarmerki og eins er lýsingu ábótavant og hefur borgaryfirvöldum verið send ábending vegna þessa. Meiðsli vegfarandans voru ekki talin alvarleg. Það er mat lögreglu að hægt sé að koma í veg fyrir umferðarslys leggist allir á eitt um að aka gætilega og sýna tillitssemi í hvívetna.

Vegagerðin og Náttúrustofa Austurlands vara vegfarendur við umferð hreindýra á Austur- og Suðausturlandi.